काठमाडौँ, । लेखक तथा वरिष्ठ पत्रकार, टंकप्रसाद आचार्य स्मृति प्रतिष्ठानका सदस्य सचिव, श्री गोविन्द दुलाललाई नेकपा (एमाले) को दोस्रो पूर्ण बैठकले केन्द्रीय सदस्यमा मनोनित गरेको छ ।
पाँच वर्षअगाडि नेपाल प्रजा परिषदबाट एकीकरण प्रक्रियामा एमालेमा प्रवेश गरेका दुलालका दर्जनौ कृतिहरु प्रकाशित छन् ।
गणतन्त्र प्राप्तिका आन्दोलनमा पत्रकारिता क्षेत्रबाट महत्वपूर्ण योगदान गरेका दुलाल तत्कालीन समयमा राज्य तथा विद्रोही दुबै पक्षको आँखाको तारो बनेपछि मुलधारको पत्रकारिता छाडेर काठमाडौ विस्थापित भएका थिए ।
काठमाडौँमा उनले जनविचार पब्लिकेसन एण्ड रिसर्च सेन्टर सञ्चालन गर्दै अनुसन्धानात्मक र योगदानमूलक जीवनीमा आधारित पुस्तक प्रकाशित छन् गर्दै आएका छन । विशेषगरी लामो समय राष्ट्रिय दैनिक पत्रिकामा लेख्ने गरेको “फर्केर हेर्दा” स्तम्भको संगालोको रुपमा रहेको शताब्दीका चर्चित नेपालीहरु, हाम्रा संविधान निर्माताहरु, गोपालप्रसाद रिमालको कृतित्व, संघीयताको सवाल र आधार, शैक्षिक विकासको इतिहास र विद्यार्थी वर्गको भुमिका, टंकप्रसाद आचार्य र हिजोको नेपाल, शासन सञ्चालनमा प्रशासकहरुको भुमिका उनका चर्चित पुस्तकहरूमा पर्दछन् भने उनले विभिन्न स्मृतिग्रन्थ, स्मारिका लगायत थुप्रै कृतिहरूको सम्पादन गरेका छन् ।