काठमाडौं । पूर्वमन्त्री डा. रामकुमार अधिकारीले आइतबार धादिङमा ४५ करोड रुपिँयाको सडक शिलान्यास गरेका छन् ।
उनले नीलकण्ठ नगरपालिका १४ धुँवाकोट जोड्ने स्याउली–बडारथोक–अम्बोटे–पात्ले सडक कालोपत्रे सडक शिलान्यास गरेका हुन् । धादिङ २ को ९१० बाट निर्वाचित एमालेका सांसद् बागमती प्रदेशका निवर्तमान सामाजिक विकास राज्यमन्त्री हुन् । उनकै पहलमा आर्थिक वर्ष २०७७÷०७८ मा क्रमागत बहुवर्षीय योजना अन्तरगत ४५ करोड बजेट स्वीकृत भएको हो । उक्त सडक निर्माण कार्य यही आर्थिक वर्षमा समापन गर्ने गरी काम अगाडि बढाइएको हो ।
स्याउलीदेखि बडारथोक–अम्बोटे हुँदै मौखोलासम्म ८ किलोमिटर बाटो कालोपत्रे हुन लागेको हो । साढे ५ मिटर पिच, ०।७५ मिटर फुटपाथ, १ मिटर जोड्ने गरी ८ मिटर बाटो बन्न लागेको हो । मन्त्री अधिकारी विकासप्रेमी नेताका रुपमा चिनिन्छन् । उनले पार्टीभन्दा माथि उठेर जनताको पक्षमा काम गर्दै आएका छन् ।
बाटोको शिलान्यास गर्दै पूर्वमन्त्री अधिकारीले सडक कालोपत्रे गर्नको लागि ठेकेदार कम्पनीहरु, इन्जिनियरहरुलाई कुनै कमी कमजोरी गर्ने छुट नभएको बताए । उनले निर्माण कम्पनीलाई गुणस्तरीय काम गर्न आग्रह गरे । उक्त कालोपत्रेको निर्माण ठेक्का रायमाझी कम्पनीले पाएको छ ।