काठमाडौं । नेपाल समाजवादी पार्टीका अध्यक्ष तथा पूर्व प्रधानमन्त्री डा। बाबुराम भट्टराईले २०५१ सालपछि कांग्रेस र कम्युनिष्टले पालैपालो राप्रपा बोक्दाको दुष्परिणामबारे सरकारलाई सजग गराएका छन् ।

सामाजिक सञ्जालमा ट्वीट गर्दै डा. भट्टराईले गठबन्धन गर्दा लक्ष्मणरेखा पालना गर्न सुझाव दिएका छन् । सरकारले सत्ता साझेदार दलहरुसँग मिलेर मन्त्रिपरिषद विस्तारको तयारी गरिरहेका बेला उनको यस्तो सुझाव आएको हो । त्यसो नगर्दा दीर्घकालिन राजनीतिक क्षति हुनसक्ने खतरा उनले औल्याएका छन् । गणतन्त्रविरोधी शक्तिसँग घाँटी जोड्दा सचेत हुनुपर्ने उनको सुझाव छ ।

डा. भट्टराईले लेखका छन्, “गठबन्धन गर्दा एउटा लक्ष्मणरेखा पालना गरिएन भने ठूलो दीर्घकालिन क्षति हुनसक्छ । सरकारको अंकगणितका निम्ति संघीय लोकतान्त्रिक गणतन्त्रविरोधी शक्तिसँग घाँटी जोड्दा संविधान र व्यवस्था धै धरापमा पर्न सक्छ ।”