काठमाडौं । नेपाली कांग्रेसका सांसद गगन थापाले संसद् विघटनको विषय प्रधानमन्त्री तथा नेकपा (माओवादी केन्द्र)का अध्यक्ष पुष्पकमल दाहाल प्रचण्ड र नेकपा (एमाले)का अध्यक्ष केपी शर्मा ओलीबीचको विग्रहको कारण बन्न सक्ने बताएका छन् ।

संसद् भवनमा सञ्चारकर्मीसँग प्रतिक्रिया दिँदै उनले आजको बैठकमा नै प्रधानमन्त्री अफ्ठ्यारोमा परेको बताए ।

“ओलीजीले हालको प्रधानमन्त्रीलाई अफ्ठ्यारोमा पार्नुभयो । संसद् विघटन सोह्रै आना सही हो भनिरहँदा प्रचण्ड टेबुल ठोकौँ कि नठोकौँ भनेर अलमलमा पर्नुभयो,” उनले भने ।

अघिल्लोपटकको विवादको कारणबारे छलफल नै नगरी अघि बढेकाले सोही विषय विग्रहको कारण बन्ने थापाको भनाइ छ ।

“आजका पहिलो बैठकमा उहाँहरुले गरेको सम्बोधनले के संकेत गर्छ भने जुन विषय अघिल्लो संसद्मा विग्रहको कारण बन्यो आज यो विषयको विजारोपण भयो,” उनले भने, “यो नै विग्रहको कारण बन्छ । यो विषय हेर्दा सामान्य देखिए पनि मलाई विशेष कुरा लाग्यो ।”