काठमाडौँ । त्रिभुवन विश्वविद्यालयका नवनियुक्त उपकुलपति प्रा. डा. केशरजंग बरालले शुक्रबार कीर्तिपुरस्थित उपकुलपति कार्यालय पदभार ग्रहण गरेका छन्।

उनलाई कीर्तिपुरस्थित उपकुलपति कार्यालयमा निमित्त कुलपति प्रा. डा. शिवलाल भुसालले पदभार ग्रहण गराएका हुन्।

कार्यक्रममा त्रिविका रेक्टर, रजिस्ट्रार, डिनलगायत पदाधिकारीहरु उपस्थित थिए। पोखरा विश्वविद्यालयका पूर्वउपकुलपति बराललाई प्रधानमन्त्री तथा कुलपति पुष्पकमल दाहाल प्रचण्डले बिहीबार त्रिभुवन विश्वविद्यालयको उपकुलपति नियुक्त गरेका हुन्।

उपकुलपति छनौट समितिले आवेदन दिएका ४३ जनामध्ये ३ जनाको नाम छनौट गरेको थियो। तीन जनामा बरालसहित, प्रा. डा. चित्रबहादुर बुढाथोकी र प्रा. डा. टंकनाथ धमला छानिएका थिए।

बरालले उपकुलपति नियुक्त भएपछि विश्वविद्यालयमा राजनीतिक भागबन्डा अन्त्य गर्ने र शैक्षिक क्यालेन्डर लागू गर्ने प्रतिबद्धता जनाएका छन्।